A andi Jeeri Mawndi?

Sharing is caring!

Jeeri mawndi ko duɗal ngenndi
Ko ɗo hatanteeɓe ndenndi
Ina kaala ko yimɓe nganndi
Jeeri mawndi ko fooyre ganndal jokkoore enɗam haɓɓa ɓerɗe e dental.
Jeeri mawndi ko ƴiiwoonde ƴellitaare uurnde soori baade e caatal
Jeeri mawndi ko mawbaare mawnirde jinngere
Ɗo luure mbaraa fayndaare hiilnaa
Hinnde innde e hoɗannde koybinaa
Leñol ñiɓaa ñiiɓnaa e calɗi tabitɗi gila e baaba Aadama haa Ilo mawɗo woni Nuuhu daɗndiraaɗo nguurndam. Gila nagge alaa, yettoode alaa, uuro e jaalo ngalaa.
Gila pulaar wonnoo pul peƴte ngalaa
Ko ɗemngal woni ɓoggol Geno ngol hono mum alaa
Koɓɓowol ɓiɗɓe leñol ɗo ceerndoowo alaa
Waɗde banndi am pullo
Wiico innde ma, hinnde e yettoode ma
Naŋto e pulaar ɗemngal ma
Ɓamtu ngal toowaa
So ngal ñifii majjaa
Jubbol so lolliniima
So a ƴoƴɗo toppito ngujaa.
Ɓalewol ma danewol
Mbaydi kine ma e sukundu ma ma gollal mbaɗtaa fof ko pinal ngal paggiti-ɗaa
Arɗo, farba, jarno e jaltaaɓe, elimaan e jaagraf fof wonaa iwde leñol maa
Ko pentu-ɗaa innu-ɗaa wonataa ko woodnu maa.
Iwdi hecci Ilo e boɗwal e maama Maakama
Hecci Kah, Bah, Bari e Baal.
Iwdi ma ko gila mittere, ɓakkere, wiltere haa heɓi nehɗo Pul jibinɗo winndere.
Fin, daro woɗɗo majjere
Pulaagu wonaa mehre ko iwdi winndere.
Teddinen yoo tiiɗnu haɓɓere, ɗalen luure kam e ndaarde feƴtere
Njiɗen pulaagu ndardo-ɗen jinngere
Mbiyen, fof fof ko fulɓe ko aldaa feƴtere
Fuɗnaange, hiirnaange; rewo e worgo yiɗde yoo laato wootere
Pulaar pulaar
Ko aan woni faaro pullo fof
Mi soodtiriima ƴiiƴam am, ngalu am kam e semmbe fof
Pulaar pulaar ko aan woni faaro fulɓe fof.
Abuu Raasin Njom

Leave a Reply

This site uses Akismet to reduce spam. Learn how your comment data is processed.