Aawu lekki gam keba Nafooda lekki

Sharing is caring!

*LEƊƊE*

1) Leɗɗe mi faami no keewii e barkaa
2) Ɗe Pinnda, urngol tefee ɗe kokka
3) Naange to ñaaɗii, ɗuɗɓe e ley maaje ɓe pukka
4) Gewti no belɗi e ley maaki ki barkaa
5) Taa faami ko mbii-mi, a anndi ka kaal-mi ka mawka
6) Haala mi haali mi anndi a anndi to noppi ka mbelka
7) Taa miiji no haani a faamay no haala kaa keewka
8) Min to mi haalay, mi artay mi faama ka laɓka
9) Nde mi numti ka maaki, taw-mi no haandi mi winnda ka maaki ki barkaa
10) Leɗɗe mi miiji no haani ɗe aynee

11) Awdi maaje, aan haɓdu ɗe aawee
12) To fuɗɗam, awdi no haani ndi saawee
13) Yawnu to woɗko faamaaka a ƴamta ngam waawee
14) E kootoy haani ka aynuki leɗɗe no wolwee
15) Aan maa nde non kam haani a tawee
16) Kaalaaka ka metti kam fuu ay haani ka siiwee
17) Saliiɗo ka aynuki leɗɗe kam fuu ay haani o riiwee
18) Mi so”oto ɓaawo e wi’igo ka bote leɗɗe no ɗuuɗi e haani ɗe aawee
19) To njumri yo ngiɗɗaa, too anndu to maaje ndi iwii ndi nasti to njoowee
20) Ngam non, mi ƴownetee ka leɗɗe haani ɗe aynee

21) Tiɗɓe ba maaɗa fuu ƴownu-ɓe njawna ɓe pinta
22) Naa hannde ka bote maaje, ammaa to neeɓii haani a famta
23) Min e mi faami taa muyɗo a aawii yesso ɗe nafta
24) Ɓurda botee maa, aawu dimooje ngam jaango ɗe mbelta
25) Taa eewii hiite to ɓadowii, yawnu a fadda a riiwta
26) Ndiyam to famɗoyii, mi sawrete haɓdu a yarna, joorɗe boo haani awta
27) Belɗum heewi nde ka leɗɗe mi hiimi mi winnda mi limta
28) Faamu fa belɗum, deftere maaɗa ley maaki haani a jannga famta
29) Paamuɗo ko kaalu-mi jonta mi ƴownitii ndikka o wayloo ngam woodi ko tiitaa
30) Haa jooni mi fuɗɗitii wiigo ka leɗɗe fa haani ɗe aynee

31) Taa somu jannguki mbelka ka leɗɗe ɗe ɓenndallo e ɗowdi
32) Koo to ñawɗo waddaa, e ɗe kuutiniree sey ngi’aa ɗe ƴawndii
33) Foondu ba giliganja (zogale), annduɓe paami ɗe paydii
34) Botee heewi e maaje, gila ɗaɗi e haako e nebbam faago e pinndi
35) Taa tiinii e maaje a waawi ñamgo e ñawndaago haa moftoya njawdi
36) Nder botee maaje ko limtee no ɗuuɗii ammaa liñyooɓe artii anndi
37) Taa nanii taa reenu, yawɗin ɗaɓɓu ka maaje ngam wallay haa e ngaandi
38) Banndam ko haalaa e ɗoo fuu taa yawnu umma a nasta ngam non haandi
39) To woodi ko kaalu-mi metti e haani a muñu ngam aybe mi ɓuraay aan fuu a anndi
40) Taa yejjit hannde ɗum ka leɗɗe, min mi faamii haani ɗe aynee
Taa waawataa aawuki ujineere, aynu gootal.

Naseh Yusuf.

nasehyusuf202@gmail.com
22re Yarkooma (11ru), 2019

About kooderadiointernational

The Radio Broadcast all the way from the heart of Nigeria.

View all posts by kooderadiointernational →

Leave a Reply

This site uses Akismet to reduce spam. Learn how your comment data is processed.