Hukuuma kakkilanooha waɗki e hokkuki seedaramwol lesdi ko anndiraa National Identity Management Commission, anndinii ɗawtuki balɗe waɗki kaati seedaramku leydi e nyalannde woore. Nyalannde ɗawtaande nden woni Asawe. Ministaajo Jokkootiral e piiji Maatootiral Dr. Isa Ali Pantami, hokki umroore nden.
Hukuuma kan wi’i ɗawtuki nyalannde nden wallay yimɓe ɓe ngaɗaayno seedaramwol ngol heɓa waɗa. Ngam tokkuki umroore nde ngomnati mooɓgal lesdi hooki, nde tabitinki kala laayiiji maatootiral fuu, jokkaama e nummbaaji ɗi kanɗaa’e hukuuma hokkata kala leydiyankeejo fuu.
Umroore nden ni fuɗɗay ngila jaango 19ɓre lewru ndu’u ndu Bowte. Non maa kadi ministaajo on haɗii marɓe laayiiji maatootiral ittanki yimɓe ceede to ɓe ndaaray nummbaaji seedaramku leydi ndin taa wayaaji maɓɓe. Laayiiji ɗin ni, e ittayno Nayra 20, nde gooto fuu ɗaɓɓiti holle nummba muum, ta ɓiɗɗuki nummbaaji ɗi hukuuma kan hokki.
BALƊE WAƊKI KAATI SEEDARAMKU LEYDI ƊAWTAAMA – Surajo Tete
