Sharing is caring!

 

Keenya mawnde malla jumɓare ardiiɗo lesdi Nigeria Muhammadu Buhari yaari ngilla e gallure Ƴoola ngam saanuki leŋyii e ummatooje ema gomnati diwol Adamawa e mayde Ahmed Joɗa e Mahmud Tukur ena Abdullahi Ɗanburam.

Gomnajo Ahmadu Umaru Fintiri e ballo mako Chief Crowther Seth ema woɓɓe gomnati’en mawɓe, hamɓe jaɓɓi ardiiɗo lesdi on haa nokkuure piiroje wonde Ƴoola, “Yola International Airport” bana misaalu njamndi 10:40am ɗum fajira/bimbire.

Sarde/yaake nde o wolwanno haa faada laamorde Ƴoola, ardiiɗo lesdi Nigeria Muhammadu Buhari wii Ahmed Joɗa wallitimo sanne, nden laatanakemo sakike nde o wonno Gomnajo diwol Woyla waladu fuuna.

Buhari ɓesdi e wiigo Moo Allah hinni Ahmed Joɗa wallitimo sanne e fiiji shiyasa lesdi ndii, amma o meɗay holluki yiidde faaki koroowal shiyasa mallabo huunde duyya.

” Moo Allah hinni Ahmed Joɗa laatake sakike am sarde laatinoomi Gomnajo diwol Woyla waladu fuuna, les ardungal Olusegun Obasanjo”, Buhari wii.

Buhari yahi yeeso e wi’uki, Docta Mahmud Tukur fuu higo iyalu mako, nden o jagganake lesdi sanne sarde nde Buhari man laatino ardiiɗo lesdi les ardungal laamu sooja.

Owii oɗon jukoro e ɓiɓɓe Adamawa, ngam ɓee mballitimo sanne faaki ardungal mako. Owii ɓee meɗay cemtinki mo e dow kuuɗe o yowani ɓee.

Buhari fii’i misaalu e ministajo galluure Abuja “Minister Of The Federal Capital Territory” moo jotta Mallam Muhammadu Musa Bello, moo owii ɗon huuwa kuuɗe mooƴuɗe ngam fownutuki gallure nden.

“E miɗon maati ummatoore Adamawa ngam ɓee mballiti am haa jahale ardungal am. Ɓee tiɗɓe. Hanjum waɗi ndokkumi ɓiɗɗo mooɗon ministajo galluure Abuja, nden boo o semtinay en” Buhari wii banni.

Ardiiɗo lesdi on, tooranake mayɓe ɓen yafuye Jowmiraawo, o dokkuɗo lenƴol mayɓe ɓen, gomnati ema ummatoore diwol Adamawa noo fotii munyal ustarii ndiin.

Hanko boo sarde nden o wolwanno, Gomnajo diwol Adamawa Ahmadu Umaru Fintiri yettake ardiiɗo lesdi Nigeria man Muhammadu Buhari e ngilla ka o waddi Ƴoola ngam foofo ɓee maskiiɓe.

Gomnajo on wii moo Allah hinni Ahmed Joɗa ema Docto Mahmud Tukur jagganake lesdi ndi sanne. Nden ɓee laatake higo’en ɓee tukus le ardiiɗo on.

Lamiɗo Adamawa Docto Muhammadu Barkinɗo Aliyu Mustapha, hanko fuu o mani ardiiɗo on e ngilla ka o waddi Ƴoola, owii Allah ceniɗo hoorumo gallure Abuja jam.

Nden haa ragare, liimanjo Mawɗo mo juulirde Moddibbo Adama ɓamti do’a Allah ceniɗo yaafo, hinno mayɓe ɓen.

Bindol: Hassanu Giɗaɗo Suɗi