FULƁE WAYNAAƁE HOKKAAMA ASAWEERE WOORE ƁE ACCIDA LADDUƊE DIIWAL ONDO

Bindol: Surajo Teete

Fulɓe Woynaaɓe aynooɓe na’i maɓɓe to diiwal Ondo, hokkaama asaweere woore, ɓe accida diiwal ngal. Haala fartuki Fulɓe woynaaɓe ɓen anndinaama, nder anndinoore nde ngomnaajo diiwal ngal, Rotimi Akeredolu, winndi, to jaaynjaaynde Twitter maako. Nden kadi o hokki taadiiɓe diiwal ngal umroore, dow, ɓe tabitina haala mako kan ka tokkaama.
Ngomnaajo on ni, wi’ii, woynaaɓe ɓen e tuumiree wujjuki yimɓe ngam ɓe dokkee ceede. Nden kadi ladduɗe to ɓe durata na’i maɓɓe ɗin, ɗon nanngaaɓe ɓen suuɗete, to ɓe nanngowaama. O wi’i, sabu non, o hokkii woynaaɓe ɓen gila hannde 18ɓre lewru ndu’u ndu Siilo, yaaki asaweere woore, dow kala gaynaako fuu taa tawee e ladduɗe diiwal maako.
Fulɓe woynaaɓe ni, nder duuɓi ɗi’i e yi’ida e saɗirmaaji ɗuuɗɗi. Wujjaneeki na’i, wujjaneeki yimɓe, toonyeeki, e nyamaneeki neɗɗaaku, nyamaneeki njawdi, ɓalwinaneeki innde, e kadi hidinki-ɓe ki ngomnati lesdi ndi’i waɗi. To walaa diiwal gootal jaɓɓiingal Fulɓe, jannginaɓe, nden mbotoo njawdi maɓɓe. To ɓe njahi fuu gila fommbinaare haa woylaare leydi ndin, to ɓe ɓuri mantoraaki, ɓe kisaayi.