Woɗka gaska mawka heɓtowaama e lesdi Burkina Faso, to nguskiije Fulɓe, tawaa nder. Nguskiije ɗen ni, mooɓii worɓe halkaaɓe e nokku anndiraangu e Djibo to lesdi Burkinaaɓe ndin.
Hukuuma kaɓanooha neɗɗaaku innu aadama, ka Human Rights Watch, kan waɗi wiɗito nden heɓtoy to ɓen nihi Fulɓe kewtuɓe teemerre e cappanɗe tato (180) uwaa, ɓaawo sooji’en lesdi Burkinaaɓe ndin halkidii-ɓe.
Hooreejo hukuuma, Human Rights Watch e lesdi Faransi, Benedicte Jeannerod, kan anndini no hukuuma maako kan, ardii kuugal heɓtoyki gasɗe to nguskiije ɗen uwidaa, e nokku Djibo ngun, woylaare lesdi Burkina Faso ndin.
Nihi waɗi lesdi Amrika, anniyii haɗuki lesdi Burkina Faso ndin, ballal ko Amrika ndin woowi hokkuki-no Burkina Faso ndin. Ceede ballal ngal, e maa kare konu kannje lesdi ndin naftirta ngam honuki metta-baale’en e lesdi ndin. See ndaa jooni kadi ka laaɓi taar, sooji’en lesdi ndin e naftira baawɗe maɓɓe, to halkuki lesdiyanko’en ɓe tawdaaka saɗirma feere.
Ngam jooɗiiɓe e nokku Djibo to sooji’en halki ɓenɗaa’e ɗuuɗɓe Fulɓe, tabitinii, no sooji’en ɓen njahi haa nokku Fulɓe ɓen, nden nanngi-ɓe, suddaniɓe gite, haɓɓani-ɓe juuɗe, hidde ɓe piɗee, ɓe pat maɓɓe.
Lesdi Burkina Faso ni, bana luttuɗe lesɗe hirnaange Afrika, neeɓi nder saɗirmaaji balmanko’en. Non maa kadi hoore’en lesdi ndin, neeɓi e tuumiree halkuki Fulɓe e lesdi Burkina ndin. To sooji’en e lesdi ndin yananta ci’e Fulɓe e halkaɓe, bana no ka wanngata e lesdi Mali.
- Non woɓɓe boo kollii kulol maɓɓe, dow woyla wolaandu lesdi Naajeeriya maa, to ɓillaaji balmanko’en ɗuuɗi e diiwe Katsina, Zamfara, Sokoto, e ko taariiɗe, huunde bana nde’e e ɗon wannga. To taadiiɓe polis, sooji, e ko nanndi-ɓe jananta kala woynaaɓe fuu, halkaɓe, nden inniraɓe balmanko’en. Na’i maɓɓe boo inniree ngujjowaaɗi.
Windande: Surajo Teete
