Si tawii ko goonga, oo mooddibo wi’eteeɗo NANFO ISMAILA DIABY
Ila hitaande 1997 himo juulirde N’ko o julnira ɗun almuɓɓe makko ɓen, haray toŋe Cernooɓe ɓen kankan fii juulirgol ngol N’ko, ko ittugol tuundi e hunnduko kere.
Si tawii ko goonga ila (joŋi) 1997 himo julnirde N’ko ɗun no anndaa no fankaa. Haray ko facebook naadi mo e sonnjaa e sonko, ko fii haray golle makko ɗen no hecciri internet Gine on hitaande timmunde.
Si tawii o kawtirii e ɓen cernooɓe mawɓe ka saare Kankan ko ɓuri duuɓi 20 himo kurndoo sukaaɓe maɓɓe ɓen himo lunndii laawol maɓɓe ngol ka finnde e kadewal, hiɓe fankani mo.
Ɗun ko holli ko gootel e nder piiji ɗiɗi : Ko joganagol binndi N’ko ɗin giggol ɓurtugol, maa anngal jogagol daliili selluɗo ko dartora mo.
Ɓen ɓe laamungun halfini ton fii politik diina kan, ɓen kan hiɓe anndi haa felliti si ɓe wullitike e hoore makko, tawii wonaa Sa’uudii maa Afganistan ñaawani ɓe.
Pellet ɓe heɓataa goonga hoore makko, sabu ka sari’a mawɗo leydi Gine ndin, damal yewtungal fii diina kan e ɗenɗe taakannje ɗen Gine, ko yewtere laaɓunde poy hay e huunde ko mumaa alaa tun.
Musiɓɓe men maninkaaɓe ɓen, hiɓe haani jaɓude ɗii goongaaji ɗiɗi :
1. Yiɗugol maɓɓe ɗenngal maɓɓe ngal e pinal maɓɓe ngal, ɗun jibinanii ɓe ganndo o tafani ɓe binndi heeriiɗi « N’ko ».
2. Yiɗugol maɓɓe ɗin binndi « N’ko » giggol ɓurtungol, ɗun jibinanii ɓe gorko julnoowo (e ɗenngal maninka) sincuɗo laawol diina kesol.
Alii Muhammdu Ridaa sincunooɗo fedde Baabiya nden (Le bahaïsme, ou baha’isme) Leydi Iran 1844, ko sifa nii o gollirnoo hakkunde cernooɓe hooloraaɓe tun, ɓe fankani mo haa o gayni hodude hakkilaaji yimɓe heewuɓe.
Ontuma ɓe immii haɗugol mo ɓe ronki, ɓe fuɗɗii haɓugol mo, kono tawi laawike nge yawtii ka hoosaa ɗon.
Ko raɓɓiɗi kon : Alii Muhammdu Ridaa (1819-1850) Iran e Simon Kimbangu (1889- 1951) Kongo (Congo) ɓe heɓii tataɓo ka me’en Gine, on hino maakee : NANFO ISMAILA DIABY.
Sanusii Jallo Boowoy
