WASUYEEJI MANSUUR BABA NGAY DOW SAGATAABE

Sharing is caring!

Ɓataake peewɗo e sagataaɓe wuro; kala wuro.
Sagataaɓe wuro, njetten Geno gooto goodnuɗo daara wuro.
Njetten annabi gardiiɗo kala almaami wuro.
Sagataaɓe, ndaroɗee darnde saggitde geɗe wuro.
Ndentinee renta kala dente wuro.
Woto tikkee, tekkee, tekkanee, roondaade wuro.
Teddinee kala mawɗo; kormoɗee seerenɓe wuro.
Kersee, korsee, hakkillaaji, peeje, nayeeɓe wuro.
Tamondiree, tiiɗee, saɗta sorde ndiyam wuro. Ñemmbee mawɓe haŋki moƴƴinɓe geɗe wuro; fodde fonnduɓe nuunɗan-ɓe kala neɗɗo wuro.
Ngoɗɗoɗee jinngol faltaade kala fooyre wuro.
Ustude yaɓɓude ufnaade kala hinnde wuro. Potndee fota potal hakkunde ɓesngu wuro. Peñinee, feeña, nuunɗal seedtoo yimɓe wuro. Gooto ngonee ndentee yooltude hujjaaji wuro. Jokkere enɗam yarlitaade kala ɓamtaare wuro.
Tiiɗee tiiɗnoɗee ndeenee kala kuule wuro. Pelmoɗee, pertoɗee, perɓitoɗee, kala pirtoowo wuro.
Ngonee suusɓe fellitɓe reenooɓe ngalu wuro. Riiwooɓe riddooɓe kala ñaayoowo keeri wuro. Ɓittee, ɓilee, ɓiɗee, ɓiroowo Kocce wuro. Kiwee cuuɗiiɗi, cabbinɗi, ŋoñotooɗi gese wuro. Lottee, lottuli, lotta, luttooɓe jey wuro. Tukkoo, murɓoo, marɓoo, parɓoo, leydi wuro. Kaɓee, kaɗee, kiiɗoɗee, kulɓinee, ceerndoowo wuro.
Sela sela-weñcete, duuñtoo, joñoo, jonnde wuro.
Ndiiwee caroowo, sankita, caaktoowo sirluuji wuro.
Willee, wila, wirnoo, fewjooɓe wuro;
Baaba walla neene kala nuskoowo wuro.
Koɗo walla koɗdiiɗo jiidaaɗo jiiɓoowo wuro. Ndeentoɗee loggitde loŋ-loŋe loŋondirde enɗe wuro.
Loŋondiree, loggoo, loggee, loŋondira ɓesngu wuro.
Caloɗee pecce peccooje pecitooje peecooje wuro. Pittooje pittaali piɗɗooje kawral ɓerɗe wuro. Kaɓoɗee leñam-leñamaagu hakkunde kinɗe wuro.
Caloɗee kinɗon, ndenton, pellon, ceerndowon wuro. Dawruɗi, dawruɗi dawɗi seerndude ɓiɓɓe wuro. Heedi heeda heedannde ɓaggude tooñoowo wuro. Sagataaɓe ndiiwee simme bonɗo bonnoowo wuro.
Diilooɓe diidnuɓe waylooɓe koye sukaaɓe wuro.
Jiiɓ-ɓe jiɓuru jibinndu jiiɓa luuɓoowo wuro. Kulaani, kersaani, cuuɗaaki, ngonndaaka, ɓamtaare wuro.
Kaɗee wuri karte hakkunde luumo wuro. Wuyɓe fuuntooɓe cuuɗaaki gite yimɓe wuro;
Ina ndaara alkaateeɓe daraniiɓe ndeenka wuro. Gite futtinɓe ngonndaaka ngoƴaaji yimɓe wuro. Ngonee gooŋɗuɓe gooŋɗinooɓe goonga tooñaaɗo wuro.
Ndiiwee, ndiwnee, fenaande diwa woɗɗitoo wuro.
Ciynee, caɗtinee, fawre fawatoonde tiwaande wuro.
Njoɓnee, njoɓa, njoɓnee, konngol kulaandi wuro. Sagataaɓe, ndaroɗee laaɓa laaɓal ceŋɗe wuro. Ngoɗɗinee, woɗɗa, goɗɗal woɗɗa jine ngiɗɗitoo wuro.
Ngasee calɗi; ndarnee, kunndee, caaleeje wuro. Ɓuuɓa ɓuuɓri ɓuuɓna ɓerɗe mawɓe wuro. Kaɓoɗee kala feƴƴooɓe bonnooɓe ladde wuro; Soppooɓe, sirooɓe, duppooɓe, nehaande wuro.
Tiiɗee, tiiɗnoɗee, tiiɗnonoɗee, kala leeɗe wuro.
Tiiɗoya, yooɗoya, aroyooɓe janngo yonta wuro.
Kirjinee kala aamɓe, ŋoŋooɓe, ɗaaniiɓe, wuro; Joñiiɓe, ɗoŋiiɓe, ruŋtiiɓe, kala golle wuro.
Coftee, ciftoree, tikkuɓe, gedduɓe, batuuji wuro. Ngarta ndartoo ndaranoo darnde kisal wuro.
Kaɗee fijirde ñande maayde yanani wuro; fotde balɗe ngam sunu maayraaɓe wuro.
Kolli, buubaaji, ndartinee saanga jeŋre wuro. Reentaade lor ñawuɓe, ɗoyngol mawɓe wuro. Woto ngonee aynaaɓe janfotooɓe sardi wuro. Joftooɓe ñirɓinoo kappa conngi ladde wuro. Ngonee aynaaɓe hisnooɓe njoftina jawdi wuro.
Naamnditteeɓe janngo desnde walla luɓal wuro. Kala doole donkitɗe roondaade doŋle wuro, ndokkitee doole kese kesɗitina kaɓɓi wuro. Heppere walla heñaare jiirde golle wuro jiiɓat weña gollooɓe jilɓina golle wuro.
Kala dariiɗo, dadiiɗo, himmirani ɓamtaare wuro; mantee, mawninee, yeeɓee, nder peñcu wuro. Nganndee kala maayɗo birniiɗo galleeji wuro, wonta daartol yimɓe hakkunde kiirɗeeli wuro. Geno sellin doole daraniiɓe dadaniiɓe wuro. Mbaylaa jikkuuji jikkooɓe jikkanɗe jiggoore wuro. Geno, wallu, reen, semmbin, sagataaɓe wuro.
Timmin, yettin, moƴƴin, faandaare ɓiɓɓe wuro. Njaafoɗon Mansuur Baaba Ngaydo Giɗo wuro.
Kala pergitte, perɓitte, pertinɗe, ɓerɗe wuro.

 

Winnditi ko Mohamed JALLO ( U.S.A) dow umroore A.BELLO-JALLO mo CAMEROUN🇨🇲

Leave a Reply

This site uses Akismet to reduce spam. Learn how your comment data is processed.