Hukuuma polis’en diiwal Kano, heɓtoyii wonngo wuro, to balmi ndesetee ton nder hukuuma pamara ka Rimin Gado, taweteeka hirnaare siire Kano. Ka’a kan ni wannginaama, sarde ko kaalanoowo hukuuma taadiiɓe kan, DSP. Abdullahi Haruna Kiyawa, haaldata e jaayndiyankooɓe.
DSP. Kiyawa on, wi’ii wuro ngon heɓtowaama nder ci’el Wanngara, to hukuuma pamara Rimin Gado kan. To ɓe keɓtoyi balmi AK47, e kadi docce ɗuuɗɗe e wuro ngon. Marɗo wuro ngon ni, mbi’eteeɗo Abubakar Ismail mo duuɓi cappanɗe tati (30) nanngaama, ngam yajjinki wiɗito dow ko wuro maako ngon tawdaa.
Hukuuma taadiiɓe polis’en ka Kano, ka anndini no ka luncitoyi, no kanko Abubakar jowmu gonɗaa’e wuro, hawtata hoore e woɓɓe balmanko’en kedduɓe diiwe Kano, to ɓe ngaɗidata kuuɗe bononnda e diiwe kedduɗe Kano ɗen. Kiyawa on hollii no o’o neɗɗo hokkata balmanko’en ɓen balmi ngam waɗki kuuɗe bononnda kan.
Surajo Teete
WURO TO BALMI SUUƊETEE HEƁTOWAAMA TO KANO
