Fulɓe deh, kañumen fof e anndude e anndireede nagge ina kawri wonde nagge ummii ko e ndiyam, kono eɓe ceerti jiyanɗe e iwdi ndii.
E nder njimri, lawɓe e wammbaaɓe ina mbiyi nagge adiinge yaltude e ndiyam ngee wiyetee ko jellingeere.
Oon sahaa ko sukaabe tato worɓe jiiduɓe yumma e baaba, nge yanondiri, naŋngi nge. Hammadi oo wontoyat labbo, Sammba oo wontoyat gaynaako, Dammba kañum wontoyaa bammbaaɗo. Ko ɗoon ɓe mbiyata, Labbo dikko pullo Sammba, bammbaaɗo Demmba Jallingeere fuɗɗi ngaynaaka. Ɓirduɗe baddi, lalorɗe eeri, Mali sehi.
Malaaɗo soodi gawri keewndi, kosam keewɗam,
Arsuko e yaajeende, ñiiɓal joom-galle.
Miijo Aamadu Hampaate Bah
Aamadu Hampaate Bah, e nder deftere mum tinndi Fulɓe tinndinooji, o wiyi caggal nde Geno tagi won semmbeeji dowrowi jeynge, hinndu, ndiyam e leydi, rewni heen ko ñale ndurmbeliiwe. Ngeen ñale jibini 22 nagge, Geno resndi ɗi Caamaaba Caamaaba baa ne itti nayi ɗii fof resndi ɗi gorko biyeteeɗo Ilo Yeladi Jaaƴe Saadiga Seŋre Boɗewa Maakama, baaba Heeɗelde Ilo. Ko noon aynaaɓe nayi mbaɗi jeyi, fuɗɗi ngaynaaka e ganndal nayi caggal nde ɓe mbaɗdi aadi tiiɗɗo hakkunde maɓɓɓe.
Caamaaba walla caanaaba, sifaa caamaaba, caanaaba ko tagoore haawniinde e nder tagooje ɗe Geno tagnoo, ko tagoore ummiinde e neɗɗo ko neɗɗo jibinta ɗum, kono jogiinde sifaa laadoori mbiyeteendi ngaadaata.
Caamaaba ko tagoore diƴƴeyankoore ɗuum firti ko kala ɗo nde waawi jibineede walla mawnude, nde wattindoyta ko e ndiyam, e maayo walla caanngol. Nde ñaamataa puɗol walla ko ummii e mum, nde wuuraani teewu, nde memataa kadi liingu. Caamaaba wuuri ko kosam ɓiraɗam.
Caamaaba ko tagoore heewnde kaawisaaji, heewnde ganndal e dokke, ko ɗuum jeyi sabaabu nde yaltinaa e kuuje guurɗe gaadoraaɗe, nde yantinaa e tagooje kaawniiɗe ɗe hakkille aadee roŋkata huɓindaade to bannge faamamuya. Won e nokkuuji baŋnge funnaange, caamaaba anndiraa ko ninkinanka. E nder Fuuta tooro, yimɓi ɓee ena nana caamaaba hay so e tinndi walla e nder daari, kono ɓe ɓuri woowde nande walla anndude ko joom maayo. E kuɗol Demmba Kah. Mami artu e jokkude ngol.
