Tomas Sankara

Tomas Sankara
Lewru sarii lewlewal
Barogal unngii he doŋal
Jaambaaro fiɗɗitirii gollal
Tomas tekki pinal
Haɓɓi roondii ganndal.
Añɓe kuli e kuuɓal
Nde sankara salii kiiɓal
Haɓtorii cuusal e caasal
Eerii noddi dental
Wiyi afrik wontaa heedde caggal
Tonngi taƴii ceeren e luural
Yontii ngollano-ɗen dimɗal
Mbiyen loppet won’de baagal
Afrik wonaa mbabba dimngal
Ñamaale ɗe ngonaa e nuunɗal
Ngaree e dental
Kaɓen e baasal
Fuɗnaange hiirnaange
Rewo e wurgo
Debbo e gorko
Mawɗo e suko
Ndaro-ɗen e wolde goodal.
Woto kulɗo, tulɗo
Duttitotooɗo caggal
Kono jamfa bonnii yaakaare
Ittii e ɓerɗe hoolaare
Ñalnde 27-9-1987
Rimɓe afrik ngoyii
Ɓerɗe fof mboni
Afrik ruttii e mbaayaagu
Hiiwtii woyi njoolaagu
Kammu iirɗi jamma niɓɓiɗi
Nde lewru tiwlii saami
Yonto ngoo mugaa
Renndo ngoo ŋogaa
Cel waɗi taaɓe mbiyi tem ndarii.
Callalal worsitii afrik ruttitii. Wurwur fuɗɗitii
Njuɓɓudi firtii iiñturu lomtii
Holi to o woni? O yahii.
Jontaaɗo wayniima
Jamaanu woyii
Jaambareeɓe ngaani
Nde ɗowoowo rostii.
Tomas Sankara maayaani
Dimo men ko ko wirnii
Golle makko e baɗle toowtii
Yonto men nani sajjitii
Etee ko ko felliti
Muñal ina yooɓii
Haa afrik yiyee rentii
Afrik tinee rimɗii.
Jamma luutaare weetii
Naange ɓataare toowii
Weetii, weetii, weetii.